O/L மற்றும் A/L பரீட்சைகளுக்குத் தயாராகும் மாணவர்கள் பாடசாலைக்குச் செல்வது கட்டாயம் - பிரதமர்

GCE சாதாரண தரம் (O/L) மற்றும் உயர்தரம் (A/L) பரீட்சைகளுக்குத் தயாராகும் மாணவர்கள் பாடசாலைக்குச் செல்வது கட்டாயமாகும் என்று வலியுறுத்தியுள்ள பிரதமர் மற்றும் கல்வி அமைச்சர் கலாநிதி ஹரிணி அமரசூரிய, தமது பிள்ளைகள் தொடர்ந்து பாடசாலைக்குச் செல்வதை உறுதிப்படுத்துமாறு பெற்றோர்களைக் கேட்டுக்கொண்டுள்ளார். 

இன்று (15) நடைபெற்ற அக்கரைப்பற்று முஸ்லிம் தேசியப் பாடசாலையின் 80-வது ஆண்டு விழாவில் உரையாற்றிய பிரதமர், ஒவ்வொரு குழந்தையும் 13 ஆண்டுகாலக் கல்வியைப் பெற வேண்டும் என்று குறிப்பிட்டார். 

மாணவர்கள் சிலர் சாதாரண தரம் மற்றும் உயர்தர வகுப்புகளை அடையும்போது, ​​தொடர்ந்து பாடசாலைக்குச் செல்வதை நிறுத்திவிடுகிறார்கள் என்பது குறித்து அவர் தனது கவலையை வெளிப்படுத்தினார். 

“ஒவ்வொரு குழந்தையும் பாடசாலைக்குச் செல்ல வேண்டும். ஒவ்வொரு குழந்தையும் 13 ஆண்டுகாலக் கல்வியைப் பெற வேண்டும். குறிப்பாக, தங்கள் பிள்ளைகள் பாடசாலைக்குச் செல்வதை உறுதிப்படுத்துமாறு பெற்றோர்களை நான் கேட்டுக்கொள்கிறேன்” என்று அவர் மேலும் தெரிவித்தார்.