கொரோனா தொற்றுக்குள்ளாகியிருக்கும் நபர்களை குணப்படுத்துவதாக தெரிவித்து பண மோசடியில் ஈடுபட்டதாக கூறப்படும் போலி டாக்டர் மற்றும் அவருக்கு உதவி வழங்கிய நபரும் கெஸ்பேவ பொலிஸ் பிரிவுக்குட்பட்ட கஹபொல பகுதியில் கைது செய்யப்பட்டதாக பொலிஸ் ஊடகப்பேச்சாளர் பிரதி பொலிஸ் மாஅதிபர் அஜித் ரோஹண தெரிவித்தார். 

இது தொடர்பில் அவர் மேலும் கூறியதாவது, 

இவர்கள் முகநூலில் கொரோனா வைரஸ் தொற்றிலிருந்து குணப்படுத்துவதற்கு தங்களால் முடியுமென்று பதிவேற்றியுள்ளதுடன், அதனூடாக தங்களை தொடர்பு கொள்ளும் நபர்களிடமே இவ்வாறு பண மோசடிகளை செய்துள்ளதுடன் தனிமைப்படுத்தப்பட்ட வீடுகளுக்கு சென்று சிகிச்சை அளித்துள்ளனர். சிகிச்சைக்காக தம்மை தொடர்புகொள்பவர்களது 

வீடுகளுக்கே சென்றுள்ளனர். சிகிச்சைக்காக ஒருவரிடமிருந்து தலா 12,000 ரூபா வரை அறவிட்டுள்ளனர். சந்தேக நபர்கள் பயன்படுத்திய வேனையும் பொலிஸார் கைப்பற்றியுள்ளனர். இதன்போது சந்தேக நபர்களிடமிருந்து பல வகையான மருந்துப் பொருட்களும் கைப்பற்றப்பட்டன. இது தொடர்பான மேலதிக விசாரணைகள் முன்னெடுக்கப்படுகின்றன எனவும் அவர் மேலும் தெரிவித்தார்.

முன்பள்ளிப் பாடசாலைகளை அபிவிருத்தி செய்யும் விசேட வேலைத்திட்டத்தின் முதற்கட்டமாக முன்பள்ளி பாடசாலைகளில் உரிய வசதிகள் கொண்ட வகுப்பறைகள் நிர்மாணிக்கப்படுகின்றன. 

இதற்காக ஒவ்வொரு முன்பள்ளிப் பாடசாலைக்கும் 

6 இலட்சம் ரூபா ஒதுக்கீடு செய்யப்பட்டமை பாரிய வெற்றியாகும் என்று இராஜாங்க அமைச்சர் பியல் நிஷாந்த தெரிவித்துள்ளார். 

இதேவேளை, முன்பள்ளி ஆசிரியர்களுக்கு 2,500 ரூபா கொடுப்பனவும் வழங்கப்படுகின்றமை மற்றுமொரு வெற்றியாகும். முன்பள்ளிப் பாடசாலை கல்வி நடவடிக்கைகளுக்கென விசேட தேசிய கொள்கையொன்றும் வகுக்கப்படுகின்றது எனவும் இராஜாங்க அமைச்சர் பியல் நிஷாந்த மேலும் தெரிவித்தார்.

31-05-2021 அன்று நடைபெற்ற அமைச்சரவைக் கூட்டத்தின் போது மேற்கொள்ளப்பட்ட தீர்மானங்களை (Cabinet Decisions) இங்கு தருகிறோம். 

இதில், 

பல முக்கிய தீர்மானங்கள் அடங்கியுள்ளன. 

இதன் முழு வடிவத்தைப் பெற கீழுள்ள லிங்கை கிளிக் செய்க.

எதிர்வரும் ஜூன் 8ஆம் திகதி அதிகாலை 4.00 மணி முதல் இங்கிலாந்தின் சிவப்புப் பட்டியலில் இலங்கை இடம்பெறும் என இங்கிலாந்து போக்குவரத்து திணைக்களம் தெரிவித்துள்ளது. 

இங்கிலாந்தில் வாழ்வோர் சிவப்புப் பட்டியல் நாடுகள் அல்லது பிரதேசங்களுக்கு பயணிக்கக் கூடாது. அத்தியாவசிய பயணத்துக்கு மட்டுமே சிவப்பு பட்டியல் நாடுகளுக்கு அனுமதிக்கப்படுவர். மேலும் சிவப்பு பட்டியல் நாடொன்றிலிருந்து திரும்பும் எந்தவொரு இங்கிலாந்து குடியிருப்பாளரும் 10 நாட்கள் தனிமைப்படுத்தப்பட வேண்டும் எனவும் அந்த திணைக்களம் மேலும் தெரிவித்துள்ளது.

மாத்தறை பிடபெத்தர, மஹபொதுவில பிரதேசத்தில் தேயிலை மரம் ஒன்றில் இருந்து செம்மஞ்சள் நிறத்திலான இரண்டு வௌவால்கள் பீ.கே.பிரேமசிறி என்ற நபரினால் கண்டுபிடிக்கப்பட்டுள்ளன. 

இது தொடர்பில் வனவிலங்கு அதிகாரிகளுக்கு அறிவித்ததை தொடர்ந்து அரிய வகை விலங்காக கருதி அவற்றை தடுத்து வைக்க நடவடிக்கை எடுக்கப்பட்டுள்ளதாக தெரிவிக்கப்பட்டுள்ளது.

கொரோனா தடுப்பூசியைப் பெற்றுக்கொள்வதில் நாடுகளுக்கிடையே போட்டி நிலை இருக்கும் இந்த சந்தர்ப்பத்தில் பாகிஸ்தான் சீனாவின் உதவியுடன் தடுப்பூசியை தயாரித்துள்ளது. பாக் வேக் (PAK VAC) என்ற பெயரிலான இந்த தடுப்பூசி கடந்த செவ்வாய்க்கிழமை அறிமுகப்படுத்தப்பட்டது. 

இதனை 'இன்குலாப்' என பாகிஸ்தான் மத்திய திட்ட அமைச்சர் 

அசத் உமர் வர்ணித்துள்ளார். அதாவது ஒரு புரட்சிக்கு குறைவானது அல்ல என்று வர்ணித்துள்ளார். தடுப்பூசி உற்பத்தி செய்ய உதவிய பாகிஸ்தானின் சுகாதார குழுக்களுக்கும், சீனாவுக்கும் அவர் நன்றி தெரிவித்தார். 

எல்லா தடுப்பூசிகளின் பெயர்களும் இருந்து ஆய்வை நாங்கள் மேற்கொண்டோம். ஆனால் பாகிஸ்தான் முழுவதிலும் மக்களின் முதல் தேர்வு சீனாவின் சினோஃபார்ம்தான். அவர்களிடம் அஸ்ட்ராசெனகா தடுப்பூசிதான் இருக்கிறது என்று சொன்னால் திரும்பிச் செல்கிறார்கள். ஆனால் நாங்கள் 'பாக்வேக்'கையும் ஊக்குவிக்க வேண்டும். ஏனெனில் நாங்கள் அதை கூட்டாக தயார் செய்துள்ளோம். இது ஒரு புரட்சி," என்றும் அமைச்சர் மேலும் தெரிவித்தார்.

கொரோனா நோயாளிகளுக்கு சிகிச்சையளிப்பதற்கான ஒட்சிசனின் தேவை அதிகரித்து வருவதால், லிற்றோ கேஸ் நிறுவனம் கெரவலப்பிட்டியில் 25 ஏக்கர் காணியில் 

ஒட்சிசன் தொழிற்சாலையை நிர்மாணிக்கவுள்ளது. 

தற்போதைய நிலையில் தேவையான 90 மெட்ரிக் தொன் ஒட்சிசனை, அதனை வழங்கும் நிறுவனங்களால் ஈடு செய்ய முடிகிறது. எவ்வாறாயினும், பற்றாக்குறை ஏற்படாமல் இருக்க இந்த நடவடிக்கை மேற்கொள்ளப்பட்டுள்ளது. 

ஜனாதிபதி கோட்டாபய ராஜபக்ஷ மற்றும் ஜனாதிபதி செயலணியின் தலைவர் பசில் ராஜபக்ஷ ஆகியோர் லிட்ரோ கேஸ் லங்கா லிமிடெட் நிறுவனத்திற்கு இதுதொடர்பான அறிவுறுத்தலை வழங்கியமைக்கு அமைய இந்த நடவடிக்கைகள் மேற்கொள்ளப்படுகின்றன. 

இதற்குரிய காணியை வாங்குவதற்கான ஒப்பந்தம் லிட்ரோ கேஸ் லங்கா மற்றும் காணி மேம்பாட்டுக் கூட்டுத்தாபன அதிகாரிகளுக்கு இடையே நேற்று (02) திகதி கைச்சாடப்பட்டது.

தம்புள்ளை, தம்புத்தேகம பகுதிகளிலுள்ள விவசாயிகளிடமிருந்து இடைதரகர்கள் இன்றி நேரடியாக மரக்கறிளை கொள்வனவு செய்து அதனை வெலிசரை முகாமில் 12 மரக்கரி வகைகள் 

உள்ளடங்கும் வகையில் பொதி செய்து 500 ரூபாவிற்கு நிவாரணமாக விநியோகிக்கும் புதிய நடைமுறையை சிவில் பாதுகாப்புத் திணைக்களம் ஆரம்பித்துள்ளது. 

இது தொடர்பான நிகழ்வு நேற்று வெலிசரயிலுள்ள சிவில் பாதுகாப்பு படையின் முகாமில் நடைபெற்றது. இந்த நிகழ்வில் பொது மக்கள் பாதுகாப்பு அமைச்சர் ரியர் அட்மிரல் கலாநிதி சரத் வீரசேகர பிரதம அதிதியாக கலந்து கொண்டார்.

சட்ட மாஅதிபருக்கான ஒருங்கிணைப்பு அதிகாரி பதவியை புதிதாக நியமிக்கப்பட்ட சட்டமாஅதிபர் சஞ்சய் ராஜரட்ணம், உடனடியாக அமுலாகும் வகையில் இரத்துச் செய்துள்ளார். 

இதற்கான சுற்றறிக்கையை சிரேஷ்ட பிரதி சொலிசிட்டர் ஜெனரல் செத்திய குணசேகர வெளியிட்டுள்ளார். 

அந்த வகையில் சட்ட மா அதிபருக்கான ஒருங்கிணைப்பு அதிகாரி என்று எவரும் இனி செயற்பட மாட்டார்கள். 

முன்னைய சட்ட மாஅதிபர் தப்புல டி லிவேராவின் ஒருங்கிணைப்பு அதிகாரியாக நிஷாரா ஜயரத்ன செயற்பட்டார். தப்புல டி லிவேரா ஓய்வு பெற்றவுடன், நிஷாரா ஜயரத்ன, 2021 மே 24 ஆம் திகதியன்று தனது கடமைகளிலிருந்து விலகிக்கொண்டார் என்பது குறிப்பிடத்தக்கது.

கொழும்பு நகரம் உள்ளிட்ட நகரங்களுக்குள் போலி ஆவணங்களை தம் வசம் வைத்துக்கொண்டு பிரவேசிக்க முற்படும் நபர்கள் தனிமைப்படுத்தல் சட்டத்தை மீறிய குற்றவாளிகளாக கருதப்பட்டு 

அவர்களுக்கு 5 வருட சிறைத் தண்டனையுடன் 50,000 ரூபா அபராதம் விதிக்கவும் நடவடிக்கை எடுக்கப்படும் என்று பொலிஸ் ஊடகப் பேச்சாளர் பிரதி பொலிஸ் மாஅதிபர் அஜித் ரோஹண தெரிவித்துள்ளார்.

தீப்பிடித்த MV X-Press Pearl கப்பல் மூலம் சூழலுக்கு ஏற்படும் பாதிப்பை குறைக்கும் வகையில் அதனை உடனடியாக ஆழ்கடலுக்கு இழுத்துச் செல்லுமாறு ஜனாதிபதி நேற்று முன்தினம் (1) உத்தரவிட்டார். 

எனவே கடற்படை மூலம் அதற்குரிய பணிகள் நேற்று நடைபெற்றது. 

ஆனால் குறித்த கப்பலின் பின் பகுதி மூழ்கி வந்த நிலையில், 

அது கடலின் அடியை தட்டி உள்ளதால் அதனை ஆழ்கடலுக்கு எடுத்துச் செல்லும் இழுவை பணிகள் இடைநிறுத்தப்பட்டுள்ளதாக இலங்கை கடற்படை பேச்சாளர் அறிவித்துள்ளார். 

இதன் காரணமாக பாணந்துறை முதல் கொழும்பு ஊடாக கொச்சிக்கடை வரையான கடற் பிராந்தியத்தில் கடற்றொழிலில் ஈடுபட வேண்டாம் என மீனவர்களுக்கு மீன்பிடித் திணைக்களம் அறிவித்தல் விடுத்துள்ளது.

வரையறுக்கப்பட்ட சில பணிகளுக்காக மாத்திரம் இன்று (3) முதல் இலங்கையிலுள்ள சகல பிரதான தபால் நிலையங்கள் மற்றும் உப தபால் நிலையங்களையும் திறக்கப்படுகிறது. 

தபால் மாஅதிபர் ரஞ்சித் ஆரியரத்ன அறிக்கை ஒன்றை வெளியிட்டு நேற்று இதனை தெரிவித்தார். 

பொதுமக்கள் உதவிக் கொடுப்பனவுகள், மருந்து விநியோகம் உள்ளிட்ட வரையறுக்கப்பட்ட கடமைகளுக்காக இந்நடவடிக்கை எடுக்கப்பட்டுள்ளதாகவும் 

தபால் நிலையங்கள் வருபவர்கள், சேவை தொடர்பான உரிய அட்டைகள் அல்லது சிரேஷ்ட பிரஜைகள் அடையாள அட்டையை பாதுகாப்புப் பிரிவினருக்கு காண்பிப்பதன் மூலம் வர முடியுமெனவும் அவர் தெரிவித்தார். 

மேலும் இது தொடர்பில் ஏதேனும் சந்தேகங்கள், விளக்கங்கள் 

தேவையாயின், 1950 எனும் உடனடி தொலைபேசி இலக்கத்தை தொடர்பு கொள்ளுமாறும் அவர் வேண்டுகோள் விடுத்துள்ளார்.

மிக அவதானம் மிக்க கர்ப்பிணி பெண்களுக்கு சீனாவின் சினோபார்ம் (Sinopharm) கொவிட் தடுப்பூசி வழங்குவதற்கு அனுமதி வழங்கப்பட்டுள்ளது. 

இதற்கான தீர்மானம் தொற்றா நோய் தொடர்பான 

ஆலோசனை குழுவினால் எடுக்கப்பட்டதாக அறிவிக்கப்பட்டுள்ளது. 

இதேவேளை கர்ப்பிணிகளுக்கு தடுப்பூசி போட்டுக் கொள்வது உகந்ததல்ல என்ற நிலைப்பாடே இதுவரை இருந்து வந்தது குறிப்பிடத்தக்கது.